قلبي الحر
دايمًا..
بلاقي مع العسل طعم المر
والفرحة في البداية بتغر
وكل حكاية وليها نهاية
وحكايتي معاك
نهايتها بنهاية العمر
عايشة على قطرة ندى
تنزل في الصباح تروّيني
وكفاية ..
حاجة بسيطة منك بترضيني
وتخلّيني أفرح كام دقيقة من العمر
وهو ده قلبي الحر
راضي وصابر والعمر بيمر
نفسي أقولك
كل كلام في الحب اتقال
نفسي أقول وأوصف العيون
وإزاي بتكون
نظرة الحب والحنان
وأعيش معاك في الخيال
وكأنك وصلت حد الكمال
وكأني عايشة في عصر الفرسان
وحبيبي الفارس الهمّام
وأرجع تاني أقول
مش معقول
كل ده مجرد أوهام
والفراق هنا موجود
وكل يوم يبعدنا أكتر
ويبني بينا حدود
وأنا من غير ما أفكر
أدور عليك هنا وهناك
ويعدّي الوقت وأنا بستناك
وأسأل نفسي آخرتها إيه؟
ليه دايمًا خايفة عليه؟
وأنادي
وأنادي ليه؟
وهو مش سامع
ويغيب وأقول مش راجع
والحياة تبقى بطعم المر
دايمًا..
بلاقي مع العسل طعم المر
بقلمي / ليلى رزق
.png)
.png)
ليست هناك تعليقات:
إرسال تعليق