.png)
ازاى تعرف اننا بقينا مجتمع تافه ؟؟لما بدل ما نتباهي بتعليمنا و اختراعتنا و ابتكارتنا و لا اختفاء الامية او الفقر و الجوع و المرض في بلدنا نتباهي بماركة الشوز و لا الكوتشي و لا ان التيشيرت من محل كذا العالمى و الى كل حاجاته براندات و الميكب اورجينال من المكان الفلاني و بدففع فيه شئ و شويات و لما اتباهي اني مبروحش السوق الفلانى لان رخيص بس بروح المول العلاني اجيب الحاجه بخمس اضعاف ثمنها علشان اتنطط بيها علي خلق الله ..و تبان التفاهة كمان لما الاطفال يخشوا في الموضوع و بدل ما اربي عيالي كويس و اعلمهم القناعه و الصدق و الكرم و التواضع اربيهم تربية منحطه و اعلمهم الغرور و التكبر علي زمايلهم بنوع شنطتى و ماركة علبة الواني الي ابني سمعني بقول انها غالية قوووى من مكتبة كبيرة و كانها لما هتلون هترسم مستقبل ابني مش رسمة هتتقطع بعد يومين .. لما ابني يتباهى و يتخيل انه افضل من زمايله بالفيلا او العربية او النادى الي بنروحه الي ممكن يكون ميسواش وسط النوادى المحترمة يبقي كده قمة التفاهة و بعلم ابني التفاهة و الهيافة و يوم ما هيسافر ويعيش مع مجتمع محترم هيحس بحقيقته انه عديم الشخصية و ملهوش قيمه لان قيمته انا رسمتها له من قيمه الشوز و المقلمه و التيشيرت و بره مبيعترفوش بده .. قمة التفاهة لما اكون قدامى نفس السلعفي مكانين مختلفين و اختار الاغلي فيهم علشان بس الغالي ثمنه فيه مع ان وارد جدا يكون مضحوك عليا و الخامتين متقاربتين و المحل بيستعبطني و يستغفلني .. قمة التفاهة الي احنا بنعيشه اليومين دول ارحمونا و ارحموا عيالنا الي احنا بنربيهم صح و بنعرفهم ان قيمه الانسان بعقله و شخصيته و افكاره و انجازاته و اخلاقه و حب الناس ليه مش قيمته في سعر جزمته و لا ماركة بنطلونه ابدا .. ارحمونا و عيشوا الواقع انتم في عالم الثراء الحقيقى محدثين نعمه قيمتكم صفر علي الشمال .. ربوا عيالكم صح علشان لما تتباهوا بيهم بعد كده هتقولوا ابني مهندس ناجح او دكتور بارع او محاسب لا غبار عليه او مدرس عظيم مش هتقولوا ابني معاه في البنك مليار و لا اتنين و لا عشرين بس بايظ و مكروه و فاشل اجتماعيا و عمليا و علميا .. عنصريتكم و طبقيتكم بتشوه حياتنا ارتقوا قرفتونا
هبة نور 2017
ولا يزال الواقع مؤلم
.png)
.png)
ليست هناك تعليقات:
إرسال تعليق