أشرف الشاعر أمير القوافي يكتب....شكرااا ودايم

 { شكرااا ودايم }

**عامية مصرية **

بقلمي / أشرف محمد السيد

.......&......&........&......&......

(سَبْت وتَلات حَد وخَميس ، مولود بعيط أفرح وأهيص ..

حَد وتَلات وإتنين وجُمعة، أربع وعتمة، فجر وبصيص ..

إسبوع وداير زي حياتي، طالع ونازل بايع حريص.)

.........................................

( أيام نعيشها، ننتف ف ريشها، فرخة وباضت تحت الهاويس ..

السبت عَدي والحد عدي لتنين بصوموا ويا الخميس ..

الجمعة اَصَلي وألبس واحَلي، والشيخ بيوعظ، والحال خسيس .).

............................. ...........

( ساكن ف حارة , فيلا وعمارة ، والفكر شارد عاوز ونيس ..

شبكة وجوازة ، فَرْح وجنازة ، واحد مطلق ، واحد عريس ..

يا دُنيا مالك ، صعبة ف سؤالك ، حتي جوابك محطوط ف كيس )...

..........................................

( شاطر بذاكر ، ناسي وفاكر ، بنجح واملحق ، غالي ورخيص ..

خَلَّصت جامعة ، مَحشي ودمعة ، لَابس هُدومي ، بدلة وقميص ..

الصبح ميتنج ، والعصر ويتنج ، شَكلي مزرجن ، وهروح فطيس)

..........................................

( بَصْبُر واشَاكِل ، واعمل مشَاكل ، والحل رايق، عامل عَويص ..

نفسي اعدي،بَسرِع واهدي، والدنيا واقفة ،والحالة بِيص ..

بجرح واداوي، وازرع تقاوي، مكتوب ونافد، ومفيش محيص ) ..

...........................................

( ضِحْكِت لي تاني، فَرح وأغاني، فقري ومرشح أبقي رئيس ..

زَبَّط اُمورك، وامسك شعورك، خليك مؤدب، خليك حَسِيس ..

هَديكوا عِيشة، حلوة ورخيصة، شاطر وبعرف بَغل وتيس )..

...........................................

( فِين البهايم، مش كنت صايم، بس بشطارتي، ف الميغة عايم ..

صَحْصَح هَدوسَك، طَلَّع فُلوسك، ولا انت غاوي ضرب وشتايم ..

تِخلع هجيبك، ايدي ف جيبك، شخلل تعدي، والنطع نايم )..

............................................

( دُنيا عجيبة، عِشة وزريبة، والشاطر إللي، لَم الغنايم ..

الدنيا فانية، تخلص ف ثانية، وإللي رايدها مجنون وهايم ..

أدِي حياتي، إسبوع وعدي، فنجان شربتوا، شكرااا ودايم )...

..............بقلمي /

أشرف الشاعر أمير القوافي