نجلاء الشنواني تكتب... كتب الكتاب

 كتب الكتاب

أنا سيبته ستاااااااشر سنة

وبعدت عنه مرغمة ع الهجر

كان الحنين جوايا بيعيط

ودموعه بلة القلب والذكرى

رافض رضوخ العقل للفكرة

إزاي يسلم روحي للوحدة

وانا كنت واحدة بتعشق التفاصيل

خزنت عمري في متحف التماثيل

وطفيت حروفي وضلم الهيكل

العتمة صرخت تعلن العصيان

لما اشتياقها زاد لخيط النور

لحظتها عزمت إنها هتثور

على كل حد بعشقها كافر

على كل عقل بيعبد التقاليد

وقفت تردد تكبيرات العيد

عيد القلم فرحان مع الورقة

هيغنوا تاني يسمعوا الملأة

وهيحكوا كل اللي اتزحم فيا

راجعين لبعض نجدد الماضي

نكتب كتابنا اللي صبر فاضي

من يوم فراقك يا حبيبي الشعر