.png)
... ياللى رايح عند ابويا .......
ياللى رايح عند ابويا
قله ان الدنيا صعبه
من غيابك
وان كل شيء بيبهت
اه يابويا
الا نارى من غيابك
نفسي اسمع حتى صوتك
او عتابك
نفسى اشم مره ريحتك
او ترابك
قوله ابنك كسروا ضهروا
يوم مماتك
كنت سندى ايوا يابا
لما مت الدنيا جاتنى
موجه تبلع الف موجه
وانا بصرخ غيتنى يابا
والخلايق واقفه تضحك
نفس تشمت نفس عوجه
والقليل م الخلق يبكى
نفسه يسند
بس كان الموجه هوجه
والسلام ف الارض ضايع
والامان بيد صايع
والحرام زايد وفايض
والحلال مكسوف ومايع
والعويل بسبع صنايع
كنت سندى أه يا والدى
لما سبت الدنيا يابا
باقى ذكرى
هى سندى لحد بكره
وبعد بكره
لما يبقى الكل بايع
ياللى رايح عند ابويا
قله ان الدنيا صعبه
من غيابك
قوله نفسي
نفسي يوم ياخدنى حضنك
وانته لسه فاتحلى بابك
ياللى رايح عند ابويا
.......... احمد عامر ..........
ننوه ان ماينشر حق مسجل بالهيئات المنوطه بذلك 3681/2022 س م ب
.png)
.png)
ليست هناك تعليقات:
إرسال تعليق