بنا حروف
انا بنا حروف
ارص الحرف جنب الحرف
تبقي كلمة
وارص الكلمة جنب الكلمة
يبقي بيت
وارص البيت بعد البيت
تبقي مدينة
قصدي قصيدة
ويقولولي مبروك
وصح لسان الشاعر
وتنزل عليا الشهادات
والتكريمات كلها ورق
يااخولنا انا عل الحديدة
الشعر ما بيأكلش عيش
ودايما الشعرا تعبانين
حتي اسألوا
بيرم ونجم والخال
وكمان عمنا جاهين
مافيش حاجة نقدية
حتي لو الورقة ام مادنة
الحتة ام مية
افصل هدمتبن حلوين
احسن من اللي عليا
واروق علي ام العيال
واجيبلها طرحة وجلبية
واجيبلها كمان خلخال
وابشرق عل العيال
واجهز البت سعدية
وادفع قسط التلاجة
ونشرب ماية ساقعة ياعنيا
وازرع قيراطين خضار
اصل العيشة غالية نار
ياعم انت بتسرح بينا
كل دة بالورقة ام مية
اه سامحوني ياولاد
اصلي نسيت اقولكم
انا مواليد
الف وتسعمية
الزمن الحلو اللي فات
والعيشة الحلوة الهنية
ماحلاها عيشة الفلاحة
ام طرحة وجلابية
وسلامتكم
انا مش شاعر انا بنا حروف
احمد محمود
.png)
.png)
ليست هناك تعليقات:
إرسال تعليق