خدني ب الأحضان وبوسني
وانسى نفسك جوه حضني
ولما تنوي إنك تسيبني
سيبني يا إبني واحده واحده
أصل حضن الفرقه قاسي
بيسحب الروح م الضلوع
وانت ماشي وربي أعلم
امتي ترجع؟؟؟
لو أراد ربك رجوع
سيبني يا إبني واحده واحده
وقوي قلبك وانت ماشي
واوعى تيجي عينيك في عيني
لتجري في عينيك الدموع
وخلي بالك خلي بالك
يا إبني ليل الغربه عاتم
والصراخ لو مهما عالي
برضو ليل الغربه كاتم
والعطور لو مهما فاحت
هتلاقيها يا إبني عادم
مر كاس الغربه راسي
ونورها لو شمس وضحاها
بيقي أضعف م الشموع
نور الغربه بصلاتك
لجل تحلي هناك حياتك
وخلي ذكر الله تملي
جوه قلبك وف لسانك
وابكي يا إبني وانت ساجد
ابكي لله م الخشوع
وادعي ربك إننا نتلاقي تاني
أنا حابه اشوفك قبل ما امشي
قبل ما امشي بدون رجوع
وزود رصيدك في الدعا من الناس
يمكن يكون لك دعوه مقبوله
واعمل تملي الخير لوجه رب الناس
تلقي تملي بفضله العقده محلوله
زود رصيدك في الدعا من الناس
ده يا بركة دعوه خالصه
من قلب مجهوله
(((.. مصطفى دسوقي..)))
.png)
.png)
ليست هناك تعليقات:
إرسال تعليق