زجل
عالم إجرام
بقلم شريف شحاته مصر
أيام تجرى وراها أيام وسنين تجرى وراها أحلام
وقت بيجرى زى البرق ظلم وداير من غير حق
أمس وبكرة فين الفرق عايشين على أرض الألغام
مجنون داير يشتم فينا ناوى يهد الأرض علينا
ويقول هو اللى بيحمينا عشان ينشر بيننا سلام
كل يومين نسمع أقواله نشوف منه جنون أحواله
يضرب فينا ويزيد ماله بقى بالذمة دة إسمه كلام
بعد قليل يرقص ويغنى ويقول عايز ناس تفهمني
تفهم قولى وتفهم فنى نفسه يكون بطل الأفلام
هو ممثل دة ولا رئيس بيحكم دولة ولا قراطيس
منفوخ زى بالونة وكيس دة اللى حارمنا يا خلق ننام
شفته يرقص وسط سلالم يقول نفسه يهد العالم
ويظهر منصور فيها وغانم الناس عنده شبه الأغنام
حد يعالج يا خلق جنونه الزيغ واضح جوة عيونه
يحفظ دم الناس ويصونه يمكن يشفى من الأوهام
مش واضح منه إنه زعيم واضح مش عقله سليم
نقولها بصدق وبالتسليم دة زعيم عصابات الإجرام
كل ما يشوف دم يزيد يفرح ما يبطل زغاريد
يرقص من سعده ويعيد والبعض يرد يقول يا سلام
محتاج مستشفى المجانين يبعد عن كل العاقلين
لو دام على الحال دة سنين يتجنن أكتر يا حرام
أصفر لونه شبه الكتكوت يحب يسمع قتل وموت
هلوسة واضحة فى الصوت كل كلامه كذب بأرقام
واجب علاج وله مفعول مهدئ فعال فى المحلول
غمة بإذن الله وتزول ويلبس بالطو بدون أكمام
بقلم شريف شحاته مصر
.png)
.png)
ليست هناك تعليقات:
إرسال تعليق