قالوا شاعر
قالوا شاعر تاني برضو
خاض في بحر الشوق بعرضه
والحروف ع السطر فرضه
والمعاني في راسه ياما
قلت جايز كنت غافل
والكلام بالشعر حافل
رغم فيه في الكون جحافل
ليها بصمة وفيه علامة
إيه في شعري يوآزي غير
أي حرف يكون ضرير
حتى قلبي اليوم أسير
والسطور حاسه بندامه .. عظمواااا
~~~~~
عظموا ... لما شافوه
قالوا لسة القلب عايش
قالوا كيف راح يوم يتوه
شكلهُ شاعر بالمعايش
قالوا شاعر رغم انهُ
جوه عينه الدمع فارش
لما يبدع يوم كأنهُ
سهم راسم حرف طايش
قالوا شاعر بالخيانه
وإللي سارق وإللي هابش
وإللي يوم ينسى إلأمانة
وإللي قام بالحفر نابش
عظموا له وقالوا شاعر
رغم عنده الشعر هامش
قلبه بحر وموجه واعر
والربيع لسآه ....... ما غابش
~~~~~
أيو شاعر حتى روحي !
حتى قلبي ونبضه فيه
مهما زادت يوم جروحي
مهما عاب فيا السفيه
لسه عندي حروف وياما
لسه للأفراح علامه
رغم شاعر بالندامة
قلبي ضايع .... مش لاقيه
قولوا شاعر زاي ماأنتوا
هاتوا ناس ع الناس وعاندوا
بالهتاف في الشعر ساندوا .. و عظمواااا
وقولوا تاني
قولوا شاعر رغم إنه
رغم دمعه الناس يغنوا
يهتفوا له إن شالله تسلم
والدموع في العين يحنوا .. عظموا
عظموا وإلقوا التحية
واحدة واحدة الفرحه جايه
والدموع دي مسيرها تمشي
والحياة حـ تكون بهية
وأرسم الفرحه في سلام
وأكتب الكلمة بعلام
وأبقى شاعر يوم همام
يومها أستاهل ..... تحيه
ياسر مهدي عمرو
.png)
.png)
ليست هناك تعليقات:
إرسال تعليق