يا واجعاني
وخانقة النبض في عروقي ...
وراسماني
ملامح ضحكة مكسورة..
معانداني
ورافضة ضمتي ليكٍ ..
مع إني
حفظتك صورة فى عيوني
ما بين الجفن والنني
وعايش عمرى مستني ..
تناديني
فتلقيني ما بين إيدك
ب اردد كلمة ملهوفة ..
لترديدك
فضميني
ودفي البرد متجمد ..
فى شراييني
وعزيني
على أيام جحيم هجرك ..
لتكويني
وضاعفي لي .
حنان يشفي أنين وجعي
ويديني بأثر رجعي
ويحييني
صاحبتٍ الندل وراكٍ
عظيم الفرق بين كدبه
وبين صدقي ..
فى عشق القلب لهواكٍ
يا فاكراكٍ
معاه هاتطولي يوم حلمك
فينساكٍ
فى أول فرصة ...
باع ودك لبايعينك
على مسمع صعق روحك ..
ومرآكٍ
وسابك تايهة جواكٍ
مع الذكرى اللى فاكرانى
ف نزلت دمعة من عينك
على خدك ف تلقانى
ب امد إيدىَ ب امسحها بتحناني
وهمسة في صوتى بتعاتبك ...
على هجرك
وطعم المر فى حلقك ...
ممرر حلو أيامى
ما أنا منك
نسيج واحد يا ضى العين
برغم البعد والفرقة
برغم الويل
برغم الويل فى وجدانى
وحتى إن كنتٍ وجعانى
فمشتاقلك
ومش هيأس أناديكٍ
وادق الباب عشان خاطرك
وخاطرك إنى أنساكٍ
غلط خاطرك
أنا حالم في ضلمة..
ليلك الحالك
أنا عاشق لنور فجرك
ف طاوعينى
وإنسي إن انتٍ تنسيني
لأني مش راح أسمح لك
أنا نبضة بترتاح لك
وشربة مية فى رحلك
فى توهة الصحرا ترويكٍ
ف خليكٍ
وخلينى أدوب فيكٍ
وأشرح لك
وأنسى إن إنتٍ واجعاني
يا عنواني
.png)
.png)
ليست هناك تعليقات:
إرسال تعليق