علي مسلم عجمي يكتب... ليلة دافئة

 (ليلة دافية ) للشاعر د. علي مسلم عجمي

----------------

بليلة البرد بردان للغاية

كل الحطب أكلتو الدفايه

اللي ناطرتني و جالسة بالبيت

من الشوق إيدا وهج شوايه

ما عرفت كيف من البرد دقيت

بابها مْتَـلِّج .. شو لحكايه

فتحت الباب.. و شكلني انهديت

بشوق و حرارة كان ملقايه

قرَّبت صوبا و جيت عالسكيت

إسرق دفا.. ظنت إلي غايه

قالت يا شاعر شايفة و حسيت

تطلب هوايي و للقرب جايي

لا تصب نار الشوق فوق الزيت

و زيت الأنوثة تحركو معايي

متأكدي إنك إنت حبيت

حب صادق ما إلو نهايه

مغروم فيها كتير و انجيت

تا صرت علسان الهوى روايه

رسمتها بشِعرك قوافي بيت

و صورتها بشرع العِشق آيه

و بين الحواري بالسما حطيت

صورة لإلها.. و عِملِت جنايه

بصوت الكناري صوتها غنيت

و بين الورد و الزهر عطرايه

للشمس صورتها رحت وديت

ال من عينها صارت مضوايه

بدر السما من خدودها ضويت

خِلقت بقالب خاص توصايه

كل الحلا و كل العسل خليت

من خدها ماخذ التحلايه

صَرخِت يا شاعر آخ شو تمنيت

شوفها أو شوف صورتها

بسرعة طلبها و بالعجل لَبَّيت

ما جبت صورة عطيتها… مرايه

الشاعر… د.علي مسلم عجمي

لبنان