محمد دومو يكتب..... تكلمات النخلة

 تكلمات النخلة

(زجل مغربي)

تكلمات النخلة على حال لمدينة

ݣالت كلام.. بحال ديال زمان

تكلمات على حوال الناس الرهيب

لي ما عاد فيه خو ولا قريب

باحت بلي حستات بييييه…

من عذاب على طول ليام

يالم كل صاحب غيرة

ولد لبلاد مأصل وشريف

يقاوم ويواصل بجهدو

بحال لي سبقوه فالطريق

هاذ النخلة زادت فلكلام

الݣلب عامر الله يحسن لعوان

كسرات أبواب كثيرة مغلوقة

ولات فيامنا حيوط مبنية بالنية

تنهدات ثاني بدات لكلام.

فرغات ݣلبها علينا راجية

طالبة بحر الغمزة وراغبة

متخلقة كثير.. من طينة شريفة

تغدا بثمارها زين الخلق لكريم

سيدنا محمد مول الرسالة

مفخرة دين..

هوية كل عربي مأصل.

فكل بقعة من بقاع المعمور

صاحب النور ولبشارة

جامع الناس بدين..

ما ليه مثيل..

مصاب يا ناس ترتاح هذه النخلة

مصاب معنى لكلام يكون محسوس

من عذاب زهرها لمكفس

لي كتعيش فزمان اليوم

ݣالت ومسايرة فالنواح بلكلام

تخنقات وصابرة عل لمحاين

فات جود الله عليها

من صبر كتقاوم بيه

مصاب نحنو

ونكونو ولاد لبلاد الرزان

محنة تكرم وتشرف

لي ما لقاتها مع ولاد ليوم

انت يا صاحبي تمعن مزيان

شوف ݣدامك و..وراك

حقق الشوفة قبل ما تمعن

نخلة بلادي هاذي لمجردة

الساحرة كل زوار هاذ لبلاد

تمعن وحكي البوح وݣول

كلام الحق يا مسكين بلا خوف

بلا حشمة وبلا دهشة لكلام

ݣول شوفتك كاملة الناصعة

بلا تنقية ولا عزلة فلكلام

ولا تظراݣ العيب

من كلام قاسح.. يجرح

ما يليق ولا يصلح يتݣال

هاد النخلة باحت ليوم

ݣالت كلامها وغادية

مغبونة تودع هاذ لمكان

حنينة مسكينة نخلتنا

أم بلادي ورمز لمدينة

شريفة معروفة من زمان

تتفكر فولادها قبل ما تزيد

تتألم وهي بنواحها كتموت

هكذا حال ولاد لبلاد

لي كيموتو بحال هاذ النخلة

-بقلم: محمد دومو

-مراكش/ المغرب