د. علي مسلم عجمي يكتب... رسالة أم إلى ولدها

 ( رسالة أم إلى ولدها ) للشاعر د. علي مسلم عجمي

-----------------------

طفلي يا أمل عمري و منايي

يا فِلذة كَبد روحي يا هنايي

كِـرمالك أنـا ظهري حَنيتو

مش تا عَلِّمك بس القرايي

تا يسلم ظهرك بظهري حميتو

من سهام الما بعرف كيف جايي

ضلوعي درع من خلفك بنيتو

و قلت أكتر يا إبني و مش كفايي

الدهر غدّار يا إبني و مشيتو

و ما بدي عيدها معاك الحكايي

يا طفلي يا حبيبي اللي قَسَيتو

بحياتي. يا زغَيـَّر يا ضنـايـي

خلاني بعد كل ال لقيتو

إحميك بجسد حاني بعنايي

كل شي بالدِني بعمري جنيتو

وحدك يا إبن بطني جَنـايـي

بجسمي يا طَري جِسمك فَديتو

أنـا الأم الحنونــة بالنهايـي

و قبل ما سراج عمري يجِف زَيتو

و قبل ما تنتهي فصول الروايي

بقدملك كتابي اللي سقيتو

دمي حروف من أوّل صِبـايـي

عمِلِـت ضلعي قلم لما بَريتو

و كتبتلك ألف بـاء الهجايي

و حَميتَك من سهام اللي حكيتو

و عندما تِكبـر تْـمَـرّا و إقـرا

عيوني عملتها لأجلك مـرايي

الشاعر د. علي مسلم عجمي

لبنان