حسام علي المصري يكتب...شو حلمك أنت يا إبني

قصيدتي بإلقاء صوتي ودون صدى استوديو ( شو حلمك أنت يا إبني )

شو حلمك أنت يا إبني

حلمي يا وطني عيش بأمان ومحفوظة كرامتي

بس حكامنا ما بدون أرض الوطن حرّة ومستقلّة

وحلمي أنا يا وطني أشتغل بس بلقمة قوتي

بس حكامنا ما بدون ياني آكل لقمة هنيّة

وحلمي أنا يا وطني إتفاق الطائف يجمع كل الطوائف عالإلفة والحنيّة

بس حكامنا ما بدون زرعوا بيناتنا الفتنة المذهبيّة

وحلمي أنا يا وطني المسيحي ومسلم السنّي والشّيعي والدّرزي والعلوي نقعد على طاولة وحدة

بس حكامنا ما بدون فرّقونا عن بعضنا بالعصبيّة

وحلمي أنا يا وطني فرحة خيّي اللّبناني فرحتي

وحزنو حزني

ووقت الشدة دمعتو دمعتي

بس حكامنا ما بدون طبّعونا عالحقد والكراهيّة

وحلمي أنا يا وطني أربح التنافس بيني وبين رفقاتي

مين بيجمع أكتر من الصحبة

بس حكامنا ما بدون حتّى من قلوبنا سرقوا المحبّة

وحلمي أنا يا وطني

أتعلم وكفّي علمي

وعلّق على الجدران شهاداتي

وتفرح فيّي أمّي وبيّيي وخيّاتي

وخلّي علم لبنان والأرزة

يرفرفوا عالي بالمجد والضحكة

بس حكامنا ما بدون الفقير يتعلّم ويتساوى مع الطبقة المثقفة

وحلمي أنا يا وطني أزرع ارضي وفرق الخير من جنى الغلة

بس حكامنا ما بدون ياني أكسب من الأجر شوية

وحلمي أنا يا وطني

موت أنا وأمّي سويّة

منشان ما أنقهر عليها ولا تنقهر علي

عمرها قرب تموت هي

وعمري أنا ضاع

ما عاد أنفع أتزوج وأضني بنَي أو بنيّة

مش قادر أسس عيلة

ولا أتحمل مسؤوليّة

بس حكامنا ما بدون يانا نموت أنا وأمي

إسمي وإسمها بيلزمون بالإنتخابات النيابيّة

بكرا بيرضونا بشي مية دولار

وبيشكرونا بأحلى تحية

بس هلأ إجا دوري أنا وقول

يا حكامنا البلطجيّة

ما بدنا لا مية مرشيّة

ولا تحية غدر متقلبة متل الحيّة

بكفي قهر ومذلّة

بكفي فقر وجوع وغربة وبهدلة

بكرا بتدور الدواري

وبترجع حليمة

لعادتا القديمة

(ألم وعتاب)

حسام علي المصري