محمد العليمي العليمي‏. يكتب...جدير بالذكر

 جدير بالذكر

___________&_______________&_________

انى مش ناوى اتغير ولا هاتبدل

ولا ناوى اكون فى أول صفوف الناس

ولا عايز اتصور ولا عايز كمان نياشين

ولا ناوى اتعلم اقول كلام معسول

وازين الباطل لحد مش قابله

وانا طابعى عمره ما اتغير

ونعمة ربى انى لما اكون زعلان

من حد يتكتب على وشى

ولا اعرف اغير ملامحى

بضحكه صفرا ومغشوشه

ولا اتصنع انى انا فرحان

.انا راضى اكون نفسى

قابل بشكلى وملامحى وظروفى

ومش ناوى اتعلم التطبيل

ولا هامسك زماره لحد

ولا ليا كمان فى النفخ

ولا بفهم فى التسبيل

.ولا هارضى لتاريخى

يكون باهت او مغشوش

ولا يكون متلون بلونين

ولا قابل يتقرى بالشقلوب

.انا نفسى كده مبسوطه

ومش عايز اكون حربايه

ومتلون بمليون وش.

وايه يخوفنى من مخلوق

وليه اغيش بالغش

.انا خريج طين بلدى وترابها

وشمسها معلمه فيا ودى زينه

واصلى كمان معروف

ومش تايه ولاعندى ملف متخبى

ولا ليا عداء مع حد حواليا

.انا مسالم وصريح ودى ميزه

مع انها عيب فى زمن تايه

. ومهما اتعاقب على طبعى

مش تايب ولا مهادن

وانا بعلن من هنا للكل

انى بوش طبيعى مش تقليد

وماليش فى صنعة المكياج

ولا بصبغ شعرى ولا لسانى

ولا بمشى ورا حد ولا بسقف للعايب