" بأدعي ربي "
أهو جانا العيد
لا لبسنا جديد
ولا بوسنا الإيد
ولا عودنا قريب
ولا عودنا بعيد
ودعنا الغالي وودعناه
وف يوم العيد شيعناه
وعليه الدمع دمعناه
ويا قلب مالكش غير التنهيد
بدون حسابات وبدون ترتيب
تسيب ونسيب ياأعز حبيب
ياطبيب ح ترد إزاي أمر المكاتيب
وتجيب العمر من جديد
بعد الأب وبعد الأم
ولا خال ولا عم
ولا حضن يضم
ولا فيه في حنانهم زيه أكيد
كنا بنتسند على بعض إحنا الاتنين
بعدك يابا ح اتسند أنا على مين
ومين ح يحس بوجعي ويجفف دموع العين
صعب الواحد يبقى وحيد
بأدعي ربي بالرحمات
يقبل مني الدعوات
وأفضل أحافظ ع الزيارات
واقرا الفاتحة في المواعيد...
كلماتي تحياتي
يحيي غازي
.png)
.png)
ليست هناك تعليقات:
إرسال تعليق