اشري من زنقة السلالين غربال.
غذي ينفعك من بعد أو ف الحال.
دير فيه معارفك و خى قلال.
يبان لك الصادق و مول لهبال
لي طاح،
لا تردو وخى يجيك هلال
حامل لك شواري من المال
ولي بقى، رآه غذي يسال
الناس شلى، حال و أحوال
فيهم لي يبيعك رخيص ل بقال
و ما يتهنى حتى يغسلك غسال
أو فيهم الصادق حتى ف لفعال
يبغيك وخى تكون ف قرون الجبال
ما محتاج غياط، ما محتاج طبال
ما عارف طبع الناس غير لي جال
يبانو ليه طبايع مختلفة و أحوال
على حاجتهم فيك؟ منهم شحال
كيف خلاقو عقلهم صغير و مزال
كثار لي كلامهم ما تهزو ظهور جمال
و على غراضك يقولو لك محال
كاين لي زدت ثقلو على أثقال
وهو باعني كيف البالي بمثقال
لا تسول فقيه ولا تضرب فال
ما تصضع راسك بالقيل و القال
لا تكثر معهم هضرة، ولا تسوال
ما ينفعك معاهم غير الغربال
الغربال يا حبيبي الغربال
كن غير كنت لي على البال
ما ك نعاير حد. لي شك يسال
قولي غير معنى ف كلام زجال
حميد الصنهاجي
الثلاثاء 05 أكتوبر 2021
مكناس المغرب
.png)
.png)
ليست هناك تعليقات:
إرسال تعليق