(( الأرض و الإنسان )).
. للشاعر الدكتور علي مسلم عجمي
----------------------------------
أنا إبن الأرض يا أرض اشهدي
ترابك بدمات الشهيد معمَّدي
كل حبة من ترابك يا وطن
هيي
الكرامة بكل غالي بتنفِدي
تراب الأرض بيظل فيك تعالجو
بينبت الخير و سوء هَمَّك فارجو
حراثة. و زرع الأرض بتراب الوطن
أفضل من تعِد المصاري خارجو
الإنسان فوق الأرض الله شتَّتو
تا يحرثوها و خير منها يْنَبـِّتو
منشان هيكي ربنا من حِكمِتو
خليفتو عالأرض الله ثبَّـتو
أرض الله الواسعة بحكمو قضى
نِزرع محبة و خير فيها عن رِضى
لكن إذا عالأرض في ظُلم و فَساد
ضاقت الأرض الواسعة و ضاق الفضا
عقل و أحاسيس و هوا و فَـيي و مَطَر
نهار و شمس و الليل و نجوم و قمر
الله الكريم العادل العاطي الودود
فرضها فرض عالأرض نِعمة للبشر
الناس متل الأرض في أفعالها
الخصبة بتنتج خيرها رسمالها
الأرض الخفيفة قد ما تاكل بذار
بتظل تعطي عا حسب مكيالها
الوطن أرض و شعب بالمبدأ أصيل
بأمن و أمان و حُـر بشعورو النبيل
ان ما دافع بدمو عن تراب الوطن
بيعيش كل العمر عا أرضو ذليل
الشمس عا أرض العروبة كلها
من دون فاصل بينها بتوصل لها
كل البلاد العرب أوطاني أنا
خَبِّـر يا شعر الشمس روح و قول لها
أنهار عم توصِـل أراضي ببعضها
بأرض العرب في طولها و في عرضها
بتسقي التآخي أهلها مَيَّـاتها
و عطر المودة بتنشروا عا أرضها
طير السما من خيرها و ثمارها
تغـذى و باني بيوت في أشجارها
ما احتاج إذن و دون أيَّـا واسطة
طار بسماها و أرضها و غبارها
من كِتِـر ما في دمع عا خدِّي انسكب
فاضت كـإنها النيل أو شط العرب
ما بـدها ڤيزا تا تجتاز الحدود
قالت يا شاعر كلنا أخوة و عرب
لبنان
.png)
.png)
